وراحت سنة ودخلت علينا سنة جديدة والله يجعلها متروسة خير وسعادة علينا كلنا يا رب
وهالبوست راح اكتبة بالعامية لان مالي خلق افكر بالفصحى ولاني ابي اناملي تكتب الي في قلبي من دون توقف
ورجعنا نكتب مرة ثانية ولله الحمد بعد الانتقطاع الكبير والسبب اني كنت ادرس الماجستير والحمد لله سلمت الرسالة والحين فاضية وما وراي الا السوالف والطلعة مع الوالدة الي زايرتني في بريطانيا
الحمد لله كانت تبي تشوف الثلج ينزل، وارتاحت لما شافته ومثل ما تقول
"الله وناسة مثل القطن ينزل من السما"
يا حلوها امي
الكل يسألني بهالفترة شنو مخططاتي وشنو ابي اسوي بعد الماجستير، الي يقول يالله لازم يكون عندج بيبي، والي يقول يالله كملي الدكتوراه، وناس تقول رجعي الكويت وتوظفي، والي عنده فلوس يقول نتاجر
وبصراحة هاللحظات الي ما يكون عندي فيها اي حدث قريب او بعيد تخليني مثل الي بادي حياته مرة ثانية، احساس صعب جدا ما تعودت عليه. ما افضل اني اكون قاعدة من غير شي اسويه و تعودت اني اكون مشغولة بالقراءة الالزامية والكتابة.
صحيح ان الحياه حلوة من غير التزام القعدة من الصبح، واخذ اجازات بالقصب من الدوام وغيرها من الامور المزعجة المتعلقة بالدوام والدراسة. بس بعد مافي هدف في الحياه اذا ماكان فيها انتاج. اتفق مع بعض الحريم لما يقولون قعدتنا بالبيت وتلبية احتياجات اسرتنا شي حلو وانجاز للمرأة. صحيح لكن باعتقادي لا ينبغي على كل الحريم باتخاذ هذا الطريق لان هناك طاقات لدى بعض النساء تستحق ان تشارك فيها المجتمع وتفيدة.
ولا شرايكم ؟؟
من اشوف الصورة اتخيل نفسي واقفة وامامي هالمنظر والطريق الي ما تبين ملامحة ووين نهايته
عساها تكون سنة خير وتييب لنا الخير علينا جميعا
24 comments:
كل عام وانتي بالف خير
نفهم من هالبوست ان خلصتو مشواركم بالغربه؟
انا احس ان الامومه اهيا اصعب مهنه ان تم اتقانها بامانه
لكن الدنيا تغيرت ومحتاجه للبنت انها تكون سند نفسها محد يفيدها فاهيا مضطره تدرس وتشتغل وتكمل دراستها بعد ليش لا
بالنسبه لي
ما اتخيل نفسي ربه منزل
ولا اتخيل حياتي تدور حوالين اربع طوف ويهال
مستحيل الام اللي تكون قاعده بالبيت ثقافتها وتعاملها تكون مثل المراه العامله اللي تخالط اشكال وارناق وكبار وصغار
فشلون الام بتربي لما يكون مداها محدود بجم متر
حتى لو قرت
او شافت
او حضرت دورات
يظل عنصر التعامل مع البشر مؤثر وكبير
مبروك عليك الإنتهاء من الرسالة وعساها سنة سعيدة عليك وعلى المؤمن الصالح بو شعر طايح :)
واقول لكم شبعوا من المناظر الجميلة ترى راح ترجعون وتشبعون غبار ورطوبة :)
وسلميلي على الماما كثير السلام والله يسعدها أكثر وأكثر.
تحياتي
سنعه يا كل السنع
هلا وغلا
:)
بالنسبة لمشوار الغربة فانه في العد التنازلي لا غربتي معتمدة على غربة زوجي وعيالي
ادعيلنا بالخير والله يسهل دربنا ويكتب لنا رب العالمين بالعودة السعيدة
:))
اما بالنسبة لكلامج عن الامومة
فهي فعلا امر صعب جدا خصوصا في زمن تعدد الاتصالات الالكترونية والحياة السريعة الي تجكع كل دول العالم في مكان واحد
لكن الشي الي ما اقدر اقنعج فيه ولا اي وحدة ما تزوجت بعدها والله يكتب لكم الزواج والاستقرار يا رب من احسن رجال العالم والدنيا، ان الامومة شي رائع
احساس غريب بالدفئ والحنية وال مممممممم ما ادري شلون اعبر عنها
ربة المنزل تكون فعلا في حاله غياب عن العالم وسعادة لما تحتوي حياتها على الرجل المناسب الي اختارتة من بين الناس عن قناعة
ولما يرزقها رب العالمين بذرية وتربيهم من قلبها وتتحمل كل شي عشان التربية الصالحة
صحيح اتفق معاج ان العلاقات الاجتماعية مهمة لكن ماهي كل شي
خصوصا في هالزومن
يعني اذا تكون ربة البيت من الناس الي يشاركون عالنت بامور حياتية مهمة اتوقع بتكون احسن من اي موظفة ما عندها غير الحش والنجرة مع الموظفين والمراجعين
وما خفي اعظم
حبيبتي سنعة
رايج عالعين والراس
والله يوفقج بحياتج
ويسهل دربج وامورج
:))
الاخ يانج
حجينا مشكور والله يسلمك والفال للعيال الله يحفظهم
والمؤمن الصالح حلو بعيني وشعرة مو طايح ولله الحمد بس انت لا تعقدة بهالكلام
:)
وانت صاج
المناظر الطبيعية مهمة للراحة النفسية
:)
والماما تسلم عليكم جميعا
اشكرك
:)
نصيحة لوجه الله
احسن شي التفرغ لراحة الزوج
ومبروك
التعليق الخامس ما ادري ليش غامض وما يبين شنو مكتوب فيه
:))
بس عرفت كلمة مبروك
صلاح
الله يبارك فيك
ومشكور على المساندة طول فترة الدراسة الطويله
ما قصرت والله يجزاك خير الجزاء
:))
اللـــــــــه يا بومهدي...
خلني ساكت لاتدقني سلف :)
ترى ان بلشت يا أنا يا انت نايمين بفندق :)
عفوا اخوي يانج والوسيم صلاح
المساسر بعيد عن هذا المكان لو سمحتو
:))
أنا ادري ان الجو عندكم بارد وايد، وما ودي اخوي يتعذب بالبرد، كافي المسكين ضعيفون، شكله ما ياكل :)
الف مبروك يا منول
عسى كل سنينج الياية تكون خير و سعادة انتي و العيال و ابوهم
:)
انا مع الناس اللي قالوا لج ييبي بيبي،اموت على البيبيات
^_^
او موضوع انج تكملين دكتوراه وايد حلو
اختاري واحد من هالاثنين
وبالتوفيق ان شاء الله
:)
Truth
يا عسل انتي
:)
انا اموت على اليهال
بس عاد تعب
تعب وايد
:)
وموضوع الدكتوراه ابعد اختيار وحياتج من الي شفته بالماجستير
معروف انها اصعب مرحلة واثقل مرحلة ببريطانيا
بس الحمد لله على كل حال
شاكرة مرورج الحلو يا حلو
:)
الحبيبة الغالية منال
ألف ألف مبروك ويا رب يحقق كل أمانيج بالهسنة وكل سنة
وكل عام وانتي بألف خير وبركة وسعادة وتوفيق ورضا من رب العالمين
ارتاحي هالفترة من الإلتزامات.. ومارسي كل هواياتج وعودي إلى كتاباتج الممتعة, وشغلي عقولنا بالنقاشات المفيدة أو سوي مسابقات مثل بو مهدي
:))
وبما انج ربة بيت متعددة المواهب ما أعتقد بتمر عليج فترة من غير هدف!!؟؟
سلمي على الوالدة واستمتعي بوجودها ووصلي لها سلام خاص جدا ولو سمحتي دزي معاها صوغة ( سنو) ويفضل كمية تكفي الفريج
:))
وردج على سنعة توفقتي فيه وصحيح مية بالمية وأنت عارفة ليش أؤيد
:))
بس تظل رغبة المرأة في تحقيق ذاتها في العمل والدراسة حق مشروع لها إذا استطاعت أن توفق بين العمل والمنزل بدون أي تقصير
:))
ونؤكد على أن المساعدة من الزوج شيء مهم جدا جدا جدا
(الحجي لج يا جارة (أو جارات)!!)
عندج وايد تعليقات مبهمة !! ما فهمت منها شي كلش ....
سلامي للجميع حبوبة
:))
وألف مبروك مرة أخرى ومنها للأعلى يا منال
:))
ين الحلوة الغالية الي لها وحشة
بصراحة كتاباتج احلى بوايد يا قلبي واتوقع انج بعدج تفكرين بس عاد يالله كافي طولتي
:))
تسلمين عالتعليق الحلو وبعد اكيد الحلو كلامة حلو
مشكورة وايد
وان شاء الله الصوغة واصلة بس عاد نطري بالمطار لان ما راح يلحق يوصل برة المطار اذا ما ذاب بالكيارة وقت الهبوط
:))
واوافقج الراي
مساعدة الزوج مهمة جدا جدا جدا جدا
:))
تحياتي للاسرة الكريمة
:)
ولكم باك تو عالم التدوين والله يخلي لج الوالدة يارب
فكري عدل شبتسوين وحتى لو قررتي الاحتمالات الثانية ماراح تروح ان شاءالله :**
نعم نشترك معج في هذا الرأي
والاكثر .. اننا سنتابع هذه المدونة باهتمام شديد
يبدو انها ذات بعد جميل ورائع
كاتبة متميزة وحرف جميل
اهلا عزيزتي سارونة
:)
يسلمو اخيتي
:)
ابن السور
منور اخي الكريم
حياك والبيت بيتك ولا نصل شيء مقابل كتاباتك
:)
تشرفت بتواجد قلمك على اسطر مدونتي
:)
يا صباح الخير والحلام المحققه
والأماني المجابه
يا صباح الحب والشوق والوله اللي مرفع رسايل لقلبج يا منال
حبيبة الزين وبعدها
رسالة الماستر ماهي نهاية الطريق
ولكنها خطوة من خطواته
تحقيقها لم يكن سهلا
عشان جذي استمتعي بانجازج .. اخذي وقتج .. عوضي اللي طافج .. اعطي نفسج حقها .. وعطي بو مهدي حقه لووووول
حبي الحياة بكل تفاصيلها وعيشيها حتى الثماله
نامي وشبعي نوم يا مره
وطلعي شبعي لويه .. اكلي شويه عشان يستوي عودج :)
وتواصلي مع حبايبج اللي انشغلتي عنهم
رجعي كتبي
وكتبي
وكتبي
طالما تملكين القلم
انج ترجعين الكويت هذا قرارج
بس لو كان قراري بقول لج راح تتعبين اذا رجعتي
وايد
اوكي راح تتمتعين بوجود اهلج وحبايبج حواليج
بس الباجي راح يزهدج حياتج
وطبعا العيب مو بالكويت
العيب فينا احنا كبشر
...
وعلى فكره لو بترجعين باجازة هالمره مالج عذر
ومن صجي بزعل
اول زياره راح تكون لي
:)
ولا ما تبين تجربين طباخي
!!
احبش يا مره
وسلمي على بو مهدي وقولي له الزين تقول لك قعده المره في بيتها نعمة
:)
I thought u already have kids!?
ماشاءالله مبروك التخرج واخذي فترة راحة واستانسي فيها من غير ضغوط ومسؤوليات :)
أتفق معك كثيرا، وأشعر تماما بما تشعرين به، والقعدة بالبيت بصراحة مملة جدا
إذا بدك خلينا نضهر سوا
:)))
الزين يا كل الزين يابعدهم
:)
منورة نور مو طبيعي
:)
ما شاء الله
ما يبيله اكلكم يخلي الشبعان ايوع
حبيبتي عزيزة وغالين من عيوني الثنتين احطج باللسته من الحين الاولى
ولا نييكم مشي ما يحتاج سيارة
:))
اموت فيج حبيبتي
والله يجمعنا على خير
ولا تحاتين
مستمتعا بوقتي مع الوالدة الى اقصى حد
والله يهدي الناس الي تحتاج هداية بالكويت من الي مازمين نفسيتنا
والله يكون بعون الجميع
تحياتي
اميرة
لالالا مو مصدقة عيني انا شنو هذا
:))
ما تدرين اشكثر فرحت لما شفتج
الله يسهل امورج
والله يديمها من نعمة عليكم
انتي واسرتج
:)
روان
:)
عزيزتي
اي عندي بنت وولد ولله الحمد
بس تدرين كلما تكلمنا قالو شنو اثنين مو كفاية
بعد الناس ما عندها الا حمل وولادة والتربية عالخدم وما في سفرات والمعاش ما يكفي
:))
هذي وجهة نظري بالموضوع
وسالفة البيبي اتوقع اني مستبعدتها
شاكرة تواجدج الحلو
:)
ضحى
حبيبتي يسلمو يا قلبي
اي ليش لا
نلتقي ونطلع نغير جو ونستانس
ما في احلى من الرفقة الحلوة في الغربة غاليتي
الله يديم المحبة
:)
Post a Comment