Welcome

مدونتي شخصية,و سأنشر من خلالها مواضيع يهتم بها اغلب الاشخاص

Sunday 12 April 2009

الى اللقاء +صور ما بعد الرحلة 4


حاول في اليوم والليلة ، ان تـتفـقد مؤمنا من المؤمنين ، بالاتصال الهاتفي او غيره ، لا لحاجة منك اليه .. فكم يدخل من السرور على البعض ، عندما تزيح همّـه بكلمة طيبة !!.. اليست هذه تجارة رخيصة ومربحة ؟! .

موقع السراج

------------------------------------------------

لن اقول وداعا ولكن الى لقاء قريب ان شاء الله ,فاننا سننقطع عن عالم الانترنت والاتصال انا وزوجي الغالي الى ان نعود بالسلامة من اسكوتلندا ,حيث رحلة قصيرة تجمعنا مع الاطفال في عطلتهم المدرسية

سنوافيكم بعدها كما عودناكم بالصور والتقارير لتعم الفائدة والمعرفة للجميع

على طاري المعرفة والفائدة بالسفر, تعودنا من الناس الي تزور بريطانيا انهم يظلون اما في لندن للتسوق او كتغيير يسافرون مناطق مجاورة اخرى ولكن ايضا للتسوق في مجمعات اخرى

يعني ما طاح الا انبطح

احلى السفرات هي الي تكون بمشاهدة المناظر الطبيعية او تعلم شيء جديد عن الديرة الي زايرينها

السوق موجود بالكويت وكل الماركات والمحلات صارت موجودة

لا تقولون لي الماركات مغشوشة ولا غالية بعد الي بيشتري ماركات يتحمل التجار وشطارتهم

والي يوصلون بريطانيا علشان التسوق نادر ما يدخلون محلات الماركات

دايما نشوفهم في محلات رخيصة كلش يعني حتى الجودة والنوعية موجود منها في سوق الديرة وغيره بس ما ادري يمكن يحسون فشلة يشترون من هناك والي شارينة من لندن وغيرها يكون من برة لو شنو يكون السعر

اتوقع اغلب الناس صار عندها هَوَس المظاهر والفخفخة وان يشترون من برة وخلاص

بدون وعي بالمبادئ والقناعة والبساطة

على العموم الموضوع يطول الكلام فيه واحس اني راح اكتب عنه بوست

الى ان نلتقي ان شاء الله في الاسبوع القادم لكم مني احلى تحية و دعاء بان يحفظكم الرحمن ولا انسى الحبيبة الغالية ام زوز ويشفيها ويردها سالمة غانمة لديرتها

اما خالي فانه ولله الحمد وضعه مستقر وقد وصل ارض الوطن بالسلامة واشكر كل من سال عنه او دعا له

وساترككم مع ما تبقى من صور رحلتنا الى اوروبا

وهذا الجزء الاخير الذي قضيناه في فرنسا حيث زرنا والت ديزني ومعالم باريس

في الجو البارد الصقيع




وصلنا والت ديزني الشهيرة في باريس




وشفنا الاستعراض




وكلينا بيتزات ميكي



وكالعادة زيارة باريس تتطلب المشي تحت قوس النصر



وزيارة برج ايفل



الشوارع كانت تحتفل بالكريسمس والسنة الجديدة



والمجمع الوحيد الي زرناه




احد الآثار المصرية على اراضي فرنسا




وهذا طريق العودة واول صور الجو المثلج في بريطانيا



وهنا ترقب الالعاب النارية للاحتفال بالسنة الميلادية الجديدة 2009
والله كانت ايام وراحت بسرعة



-------------------------------------------------------------------------------------

اترك لكم التعليقات الى ان اعود لا تستحون البيت بيتكم حياكم

والي بيشوف مواضيع الرحلة لاوروبا
الجزء الاول
الجزء الثاني
والجزء الثالث

23 comments:

Yin مدام said...

بارك الله فيك بتذكيرنا بادخال السرور على مؤمن أو مؤمنة


وموضوع التسوق من برة الكويت يبيله بوستات مو بوست
والله نفس الماركات والبضائع اللهم جم اختلاف بسيط

ويا زين الصور تهبل
مو صور بعض الناس
حاط لنا 3 سيايير ويقول مو محتاج صدقة
إلا على صورج يبيله صندوق صدقات
وواحد تبرعات بعد
:)))))))))

أخي صلاح مو تزعل نتشاقى مع زوجتك
:))

تروحون وتردون بالسلامة وعساها يا رب رحلة عائلية سعيدة ملئية بالهدوء والهواء العليل
وخالية من التكنولوجيا
وإن شاءالله تعودون نشطين وعال العال مع بوستات عال العال

:))

همسة:
" راح أفقدج " :*

بو محمد said...

عين الله ترعاكم و بحفظ الله إن شاء الله إلى أن تعودوا
دمت و الأهل و الأحبة برعاية الله

Hossam said...

Oh my goooooooooood
what a such a beautiful pics
I really love them all both of this topic and of those of Europe
really ur pics r gr88888888
hope u good all the time and have fun
bye

Dr. Ali Maarafi said...

اولا شكرا على النصيحة الاخوية

ثانيا السوق , شي مهم و بارو بالسفر, انا اقول اللي يقطع مسافة ويوشف بضاعة جميلة ويمكن موموجودة بالديرة يحق له ان يشتريها , بعد كل ديرة و بضاعتها

عموما عطلة سعيدة يارب و ان شاالله تتمتعون بالاجواء الاسكتلندية الممتعة و المناظر الخلابة
هاالله هاالله بال
loch lomond
مكان رائع و يستحق الزيارة
بحفظ الله ورعايته

Sn3a said...

متشوقه اروح باريس من صج
خصوصا ديزني لاند
من مليون سنه رحتلها

التسوق حلو ومتعه يامنال
والصراحه انا ماطوف شي بالسفر الا ان كان سعره مبالغ فيه
اما بالكويت اتردد بالتسوق لاني ادري من القطعه بيسوون الف وحده
والماركات صدقيني السالفه مو سالفه شطاره الواحد لما بيقط فلوس يقط على شي مضمون مو شي يقرا بالجريده ان مغشوش حرام


بس صح كلامج وايد يسافرون لمجرد التسوق وهالشي اصلا يخليهم يردون من الديره واهم مو شايفين ولا شي


توصلون بالسلامه
وتورونا صور رحلتكم اليديده ان شاءالله
الله يحفظكم

bent el deera said...

البوست يهبل فر فيني وانا قاعده بمكتبي

غلاتي تروحون وتردون بالسلامة :>

واتمنى لكم من كل قلبي الاستمتاع بكل ثانيه فيها :>

Yang said...

إقتباس:
لن اقول وداعا ولكن الى لقاء قريب ان شاء الله ,فاننا سننقطع عن عالم الانترنت والاتصال انا وزوجي الغالي الى ان نعود بالسلامة من اسكوتلندا
انتهى


أكيد زوجك الغالي الحين, مو راح يطلعك, وهو المسكين تبخلين عليه حتى بربع صورة.

نساء, مشكل

والفقير بس ساكت وصاير سايق تاكسي, الله يعينك يا بومهدي, ما عليه كله بأجره, ترى هذي أم عيالك وهذيل عيالك, إتعب شوية, إنشاء الله يحنون عليك.


الله يحفظكم أجمعين, ويحنن قلوب بعض الناس عليك :)

fatto said...

اتروحون وتردون بالسلامه ياب وحمدالله على سلامه خالج واستانسو قد ماتقدرون .. ورحلتكم الي ابفرنسا رووعه :)

ويبيله بوست مثل ماقلتي عن المظاهر وهالسوالف الي مالها معنى .

راح نشتاقلج وايد :)

Safeed said...

من أفضل الأعمال إدخال السرور على المؤمنين
جعلنا الله و إياكم من هؤلاء بلطفه و بركته
.
.
في حفظ الله و رعايته
:)
و عطلة سعيدة إن شاء الله
.
.

الأجواء أضافت على الصور روعة أكثر :)

AbWaBy said...

سوف نفتقدك من غير شر غنشاء الله تروحون وتردون بالسلامة ..

بداية الموضوع عجيبه..


والصور اكثر من رائعة وتشوق ..

Paris said...

تروحون و تردون بالسلامة

عطلة سعيدة :)

Nikon 8 said...

حمدالله على سلامة الخال توني أدري عنه
تروحون وترجعون بالسلامة
:)

kuwaitawy said...

بالسلام انشاءلله

واتمنى انج تقضين افضل الاوقات

في

ادنبرا


هالمدينه جميله جدا ومناظره طبيعيه والناس اللي فيها خوش ناس بعد

ساره النومس said...

يابعد راسي والله ماشاء الله عليج

والصور عجيبة والله

فديتج والله :)

Big Pearls said...

beautiful:) have a great time

مستعدة said...

الله يونسكم بالعافية إن شاء الله..

من أحلى السفرات اللي رحت لها في حياتي كانت إلى اسكتلندا.. قعدنا بمزرعة عجيبة .. بمجرد ما أتريق قبال المناظر ترتاح نفسيتي..

صدقتي بكل كلمة قلتيها :)
لا تنشين تسوين سيديات الرحلة :p hehe

هم في مدن ألعاب وايد حلوة حق عيالج لا تطوفج :)..


الله يحفظكم..

Manal said...

رجعنا بالسلامة امس
والحمد لله السفرة كانت حلوة وايد لوما الجو الي تغير الى ضباب كثير لمدة يومين

:)

اشكركم جميعا على التعليق

والتواصل

وكل شي

:)

بس الصراحة ما كو احلى من الانقطاع عن التكنولوجيا
وجمعة الاهل
بمكان صغير
نضطر نفهم فيه بعض
ونعرف بعض اكثر

اما ادنبرا
فيطول عنها الكلام
واخليه للبوست القادم مع الصور طبعا

بس الصور موجودة على موقع الصور الخاص فيني فليكر

دمتم بالف خير

إمـرأة لا تُنسـى said...

الحمدلله على السلامة يا منال :)

بصراحة، كلامج عدل
مادري ليش الناس تتحامل على نفسها عشان يغرقون نفسهم بالماركات، ما يمشون إلا بماركات، بصراحة اكثر، اذا بغيت ادلل روحي اشتري شي واحد او اثنين عن الخاطر، وباقي المبالغ احوله الى رصيدي السري عشان الزمن يا منال، الدنيا كل مالها تزيد فيها الأزمات بكل انواعها وما يندرى ان كان مستقبل عيالنا بيكون أفضل وإلا أردى من جذي.. فالواحد لازم يخطط وياخذ احتياطاته.

أما عن السفر، فعلا احلى شي لما تروحين اماكن فيها مناظر طبيعية، شي ما شفتيه في الكويت، واجواء ثانية بعيدة عن التكنولوجيا وتوترات المدن المخملية ههههه

ادعي لي ان زوجي يرضى يوديني ماليزيا، ناطرة قلبه يحن علي ههههه.. يقول لي اوربا وأنا اقول ماليزيا، ناطرين نوصل الى حل :))

مهرة سالم said...

السلام عليكم...
تروحون وتردون بالسلامه
.........
بالفعل نحن بحاجه لمثل هذ الأمور البسيطه
طغت المصالح على البعض
.....
التسوق برع البلاد
أحسه فشخره على الفاضي مثل ما قلتي عزيزتي
أنا شفت الكويت وماشاء الله كلها ماركات ونفس الشي عندنا في الإمارات
وإذا حد سافر راحو يتشرون من أماكن رخيصه ...
ويقولونلج هذا من لندن هذا من إستراليا وإنتي تدرين نوعية المحلات بس تسكتين لا تفشلينهم
...........
أحلى شي بيتزا ميكي
......
دمـتِ بخير
وإجازه سعيده

Sn3a said...

الف الحمدلله على سلامتكم

Manal said...

إمـرأة لا تُنسـى
الله يسلمج يالغالية
:)

والله كلامج هو الي عين العقل

وان شاء الله يستفيد منه الي يقراه
ما اقدر اقول الحريم بس

لان في رياييل وشباب هالزمن ما يمشون الا بماركات بعد


والله يحفظج ويخلي لج الحساب السري
:)

وبالنسبة للرحلة الحمد لله توفقنا في البعد عن التكنولوجيا
مثل لما نروح البر بالكويت
:)

وادعي ربي يفرحكم بحلكم وترحالكم
وتشوفين وتسوين كل الي بخاطرج

:)
وزوجج ان شاء الله بيوصل الى حل
وقرار
بس انتي وكليه عدل
:)
---------------------

نهــــــــــار

وعليكم السلام يالغالية
:)

والله يسلمج من الشر
تسلمين

الحمد لله الكويت اي ماكره تنزل بالعالم تلاقينها بالكويت
او عندكم بالامارات

بس شبتقولين عن الناس

الحمد لله على كل حال
القناعة حلوة
:)

ودمتِ بخير
:)
-----------------------

Sn3a
الله يسلمج بنت العم الغالية

:)

منورة

sahar said...
This comment has been removed by the author.
ماليزيا said...


الان افضل عروض السفر من خلال افضل الفنادق في تايلاند بتوفير جميع المستلزمات لتوفير رحلة متميزه من خلال فنادق في ماليزيا باقل الاسعار كما نوفر افضل الفنادق في ارقي الاماكن من خلال افضل منتجعات المالديف بخصومات و عروض تناسب الجاميع تواصو معنا الان من خلال موقعنا